Beskrywing

Calamari 9 is 'n selfsorgwoonstel teen die see op 'n pragtige stukkie van Ramsgate se Noordstrand. Dié vakansiewoonstel spog met 'n pragtige uitsig oor die strand en die see. Gaste kan direk van die veranda af na die strand stap, dis net 30 m ver.

Calamari 9 is 'n duplekswoonstel met slaapplek vir 6 gaste in 2 slaapkamers bo. Altwee slaapkamers het koningingrootte-beddens en daar is nog 'n slaaparea langs die sitarea onder met 'n enkelbed en 'n uittrek-bed. Altwee kamers en die sitarea het asemrowende see-uitsigte. Die hoofslaapkamer en die sitarea het lugversorging en daar is 'n plafonwaaier in die tweede slaapkamer. Een van die badkamers is en suite en het 'n bad en dei ander badkamer het 'n stort en wasmasjien. Daar is ook 'n aparte gaste-toilet.

Let op dat die lugversorging van 'n voorafbetaalde meter gebruik maak en dat dit deur die gas aangevul moet word indien dit gebruik word.

Die oopplan-kombuis is met 'n skottelgoedwasser, stoof, oond, yskas-vrieskas, mikrogolf en 'n tuimeldroër toegerus. Daar is ook 'n ontbyttoonbank met stoele. Die sitarea het 'n sitkamerstel met sitplek vir 6 en 'n platskerm-TV met premium Explora DStv en 'n DVD-speler. Die eenheid het ook onbeperkte WiFi (vesel) met Netflix.

Die eenheid het ook 'n ononderbroke kragtoevoerstelsel sodat gaste heeltyd TV kan kyk en WiFi kan gebruik tydens beurtkrag.

Die sitkamer lei na 'n lieflike patio met meubels, ingeboude braaigeriewe en 'n groot grasperk waarop die kinders kan speel. Daar is 'n enkelmotorhuis en die eenheid het 'n alarm en 'n kluis.

Die eenheid word nie skoongemaak nie, maar kan gereël word teen 'n ekstra fooi en handdoeke en linne word voorsien. Onthou asb. om jou eie strandhanddoeke saam te bring.

Die kompleks is loopafstand vanaf Ramsgate en Margate se Blouvlagstrande, Waffle House, en Blue Lagoon Restaurant. Vir diegene wat verkies om te ry sal dit net so 3 minute neem. La Capannina Restaurant en Just So restaurant is ook net 'n klein entjie se stap, 200 m, van hier af.