Beskrywing

Ramsgate Rendezvous 13 is ’n smaakvol versierde eenheid op die eerste verdieping van ’n veilige kompleks in Ramsgate en bied pragtigte see-uitsigte. Die eenheid het nie enige trappe vanaf die parkeerarea nie.

Die woonstel bied verblyf aan tot 6 gaste en beskik oor 3 slaapkamers, 2 badkamers en ’n oopplan-kombuis en -leefarea. Die hoofslaapkamer het ’n dubbelbed en ’n en suite-badkamer met ’n bad, toilet en wasbak. Die kamer het ook ’n plafonwaaier en ’n pragtige uitsig oor die see. Die tweede en derde slaapkamers het elk 2 enkelbeddens en die moderne tweede badkamer het ’n stort, wasbak en toilet. Alle linne word voorsien en gaste moet hul eie handdoeke saambring.

Die kombuis is ten volle toegerus vir selfsorg en is met ’n stoof, oond, yskas-vrieskas, mikrogolfoond, eetgerei en breekware toegerus. Daar is ook ’n tuimeldroër. Die kompleks het ’n wasgoedkamer waar wasgoed gedoen kan word. Die eetarea het sitplek vir 6 gaste en die sitarea het ’n gerieflike sitkamerstel, sowel as ’n TV met DStv. Gaste moet hul eie dekodeerder en slimkaart saambring. Alternatiewelik kan gaste DStv op die slimboksie stroom aangesien daar gratis onbeperkte WiFi beskikbaar is.

Die leefarea lei na ’n lieflike patio-area en het stoepmeubels, sonstoele en braaigeriewe. Die stoep het panoramiese uitsigte oor die see.

Die eenheid spog ook met 'n UPS-stelsel wat ononderbroke kragtoevoer tydens beurtkrag verskaf. neem asb. kennis dat dit die geiser en stoof uitsluit.

Daar is ’n swembad in die kompleks. Daar is ook ’n onderdakparkeerplek en ’n veilige parkeerplek vir besoekers voor die kompleks.

Die kompleks bied direkte toegang tot die strand via ’n strandhekkie. Ramsgate se hoofstrand is 200 m vanaf die eenheid. Daar is winkels en restaurante in die onmiddellike omgewing.