Beskrywing

Alikreukel is 'n lieflike selfsorgvakansiewoonstel wat ideaal geleë is in die hartjie van die lewendige area Hartenbos. Dit kan 'n ideale opsie wees vir 'n gesinswegbreek, want dit is stapafstand vanaf die strand en ATKV se vermaakarea.

Dié woonstel op die grondvloer het slaapplek vir 5 gaste op 'n slag en beskik oor 2 slaapkamers en 'n badkamer. Die hoofslaapkamer is ingerig met 'n koninggrootte-bed, terwyl die tweede slaapkamer 2 enkelbeddens en 'n ekstra matras het. 'n Instapstort, wasbak en toilet is in die badkamer beskikbaar. Alle linne word voorsien; gaste moet egter hul eie handdoeke saambring.

Die oopplan-leefarea beskik oor 'n kombuis wat volledig toegerus is met 'n stoof, oond, gasplaat, mikrogolf, yskas-vrieskas, eetgerei en breekware asook 'n ontbyttoonbank met stoele. 'n Wasmasjien is ook beskikbaar. Van die kombuis af lei 'n sitkamer met gemaklike sitplek en 'n platskerm-TV met 'n volledige verskeidenheid DStv-kanale. Boonop is daar 'n etenstafel waar gaste hul maaltye saam kan geniet. Gratis WiFi is beskikbaar.

Hierdie leefarea maak oop op 'n onderdakstoep met sitplek buite waar gaste kan ontspan met 'n oggendkoffie of 'n skemerkelkie. Daar is 'n ingeboude braai wat reg voor die woonstel is. Gaste kry 'n veilige onderdakparkeerplek binne die kompleks.