Beskrywing

Artist's Cottage is 'n ruim kothuis vir tot 6 mense in Ladybrand.

Die ruim lugversorgde kothuis is versier met verskeie kunsstukke en beskik oor 2 slaapkamers; 1 van die kamers het 'n dubbelbed, terwyl die tweede kamer 2 enkelbeddens het. Die slaapkamers deel die gebruik van 'n badkamer met 'n bad en 'n stort, en warm water word deur 'n sonkrag-geiser voorsien. 'n Dubbelslaapbank is in die sitkamer beskikbaar. Gerieflikheidshalwe word beddegoed en handdoeke voorsien.

Die oopplan-kombuis is toegerus met 'n yskas, 'n mikrogolfoond, 'n stoof en oond, asook tee- en koffiemaakgeriewe, en etes kan by die etenstafel geniet word. 'n Wasmasjien is ook beskikbaar vir gebruik.

Die sitarea is toegerus met 'n TV en 'n DVD-speler, en gaste is welkom om hul eie dekodeerder, afstandbeheerder en slimkaart vir DStv saam te bring. Gratis internet is ook beskikbaar.

Die kothuis maak oop op 'n onderdakstoep en gaste het die gebruik van 'n privaat tuin. Troeteldiere is welkom met vooraf reëling. Veilige onderdakparkeerplek is op die perseel beskikbaar.

Artist's Cottage is op dieselfde perseel as die galery van Thandi Sliepen geleë, en is stapafstand van die dorp af. Gaste kan ook die verskeie rotskunsterreine in die omgewing besoek, waarvan een die nasionale erfenisterrein, Tandjiesberg, is.