Boulders Beach Villa

Selfsorg

Kapasiteit: 10 persone
Alle ouderdomme is welkom
Inkloktyd: 14:00 tot 19:00
Uitkloktyd: 10:00
Adres: Secluse-laan 13, Boulders Place, Simonstad, Kaapstad, 7975, Wes-Kaap
Vanaf R12 000 per nag (plek vir 10)

Beskrywing

Boulders Beach Villa is 'n unieke en moderne strandfrontvilla wat met 'n pragtige uitsig oor Bouldersstrand, die hawe en op die Hottentots-Hollandberge spog.

Dié villa bied slaapplek aan 10 gaste en beskik oor 5 slaapkamers wat elk 'n koninggrootte-bed en 'n en suite-badkamer met 'n stort, toilet en 'n wasbak het. Een van die badkamers het net 'n bad. Donsbeddegoed, gehaltelinne en strandhanddoeke word voorsien. Die vyfde slaapkamer is deel van 'n aparte eenheid wat aan die agterkant van die perseel is en sy eie sitarea met 'n TV en 'n slaapbank het. Dit lei na die agterste binnehof met 'n gasbraai, tafel en 'n buitestort. Daar is ook 'n gastetoilet langs die TV-area.

Die oopplan-kombuis is met 'n yskas-vrieskas, gas- en elektriese stoof, oond, mikrogolfoond, broodrooster, eetgerei, breekware, koffie- en teemaakgeriewe toegerus. Die opwaskamer het 'n wasmasjien en 'n tuimeldroër. Daar is ook 'n etenstafel met stoele. Die leefarea het 'n sitkamerstel, kaggel en 'n platskerm-TV met die volle pakket van satelliet-TV. Glasstapeldeure lei na 'n ruim onderdakterras met braaigeriewe wat verder na 'n verhitte plonspoel lei.

Die onderste verdieping het 'n mediakamer vir kindervermaak. Daar is 'n TV en 'gaming console'. WiFi is beskikbaar. Die solder het 'n dakterras met 'n tweede braai, kroeg en 'n eetarea. Hierdie villa spog ook met 'n lieflike tuin wat om die huis strek.

Hierdie verblyf maak van sonkrag gebruik en word dus nie deur kragonderbrekings geraak nie. Die villa het goeie sekuriteit, alle vensters het diefwering en daar is 'n elektriese heining. Dié verblyf se hek is 'n paar meter vanaf die ingang na Bouldersstrand se pikkewyne en daar is genoeg parkeerplek in die parkeerterrein voor die Villa.

Kry ’n Kwotasie