Beskrywing

Chesapeake Bay 30 is in die skilderagtige en gewilde kusdorp Margate in KwaZulu-Natal geleë. Die unieke woonstel met 'n groot balkon, 2 slaapkamers en 2 badkamers is 'n netjiese, goed toegeruste, selfsorgwoonstel in 'n veilige kompleks.

Die leefarea en hoofslaapkamer het skuifdeure wat lei na die groot balkon. ‘n Panoramiese 180°-uitsig oor die strand en branders kan vanaf die balkon geniet word, sowel as ‘n pragtige uitsig vanuit die woonstel self. 'n Mens kan hoor hoe die branders breek.

Die woonstel se ingang is op dieselfde vlak as die parkeerarea met die groot voordeel dat daar geen trappe vanaf die veilige parkeerarea, swembad, tennisbaan en wassery na die eenheid of binne die eenheid self is nie. Aan die seekant is dit egter op die tweede verdieping, wat dan die ongelooflike see-uitsig bied. Dolfyne en walvisse word gereeld vanaf die balkon en vanuit die woonstel gewaar.

Dié eenheid is ten volle ingerig vir selfsorg. Daar is slaapplek vir 4 volwassenes in 2 kamers en 1 kind op 'n slaapbank in die leefarea. Die hoofslaapkamer het 'n koningingrootte bed en 'n en-suite badkamer met 'n stort, met 'n skuifdeur wat na die balkon lei. Die tweede slaapkamer het ook 'n koningingrootte bed. Daar is 'n tweede badkamer met 'n bad.

Vir gaste se gemoedsrus het alle vensters diefwering en veiligheidshekke by die voordeur sowel as die skuifdeure na die balkon.

'n Swembad, tennisbaan, wassery en braaigeriewe is op die veilige omheinde privaat perseel.

Daar is een aangewese onderdakparkeerplek in die parkeerarea.

Die eenheid het 'n platskerm-TV en dekodeerder met DStv-Premium ingesluit by die prys. Linne word voorsien, maar gaste moet asb. hulle eie bad-en swemhanddoeke, toiletware en ekstra toiletpapier saambring. Daar is plafonwaaiers oral in die eenheid.

Let wel dat WiFi nie beskikbaar is nie en dat geen troeteldiere toegelaat word nie.

Daar is 'n klein losstaande braai op die balkon.

Ekstra skoonmaakdienste is beskikbaar teen addisionele koste en kan gereël word met die verantwoordelike persoon daar.

Die kompleks is op 'n eersteklas-erf reg langs die see geleë, slegs ‘n paar meter vanaf 'n groot strandgedeelte, rotse en rotspoele, met ook 'n baie mooi getypoel tussen die rotse. Chesapeake Bay is minder as 1 km suid van Margate se beroemde hoofstrand en middedorp wat verskeie restaurante, inkopiesentrums en vermaakgeriewe bied. Ramsgate se strand en restaurante is weer minder as 3 km suid van die kompleks op pad na die Wildekus. Daar is 'n lieflike geplaveide wandelpaadjie al langs die kus van reg onder die kompleks, verby die bekende Margate-visvangkaai tot by Margate se gewilde hoofstrand. Trappe gaan af na die strand op verskeie plekke langs die roete.