Explorers Club

Beskrywing

Explorers Club is 'n selfsorghuis met Afrikana-dekor en dis gebou waar die oorspronklike spoorweg-kaartjiekantoor in Franschhoek se middedorp was.

Dié huis het slaapplek vir 6 volwassenes en 4 kinders en beskik oor 4 en suite-kamers wat almal vanaf ‘n sentrale area lei, asook ‘n kamer met 2 enkelbeddens wat in die oorspronklike gebou se solder skuil.

Die hoofslaapkamer het ‘n koninggrootte-bed, ‘n oop kaggel en dubbeldeure wat na ‘n privaat onderdakstoep, swembad en tuin lei. Dié kamer het ook ‘n plafonwaaier, ondervloerse verhitting, ‘n deurstap-aantrekkamer en ‘n groot badkamer met ‘n bad, stort, toilet en dubbelwasbak.

Die tweede kamer het ‘n koningingrootte-bed, ‘n plafonwaaier en ‘n en suite-badkamer met ‘n stort, toilet en wasbak. Die derde kamer het ‘n stapelbed vir kinders en ‘n en suite-badkamer met ‘n bad, wasbak en toilet.

Trappe lei na die ou kothuis se solder waar die vierde kamer is. Dié kamer het 2 enkelbeddens wat in ‘n koninggrootte-bed omskep kan word, ‘n dakvenster en ‘n oopplan-badkamer met ‘n bad en wasbak.

Explorers Club bied ‘n groot oopplan-kombuis, -eetarea en -leefarea. Daar is 2 sitareas in die leefarea waarvan een na die stoep lei en die ander ‘n kaggel en ‘n platskerm-TV met DStv, lugversorging en WiFi het. Die kombuis is volledig toegerus en daar is ook ‘n binnebraai.