Sal weer besoek. Ontsettend lekker gebly. Stilte, isolasie, geen internet of selfoonsein, fantastiese lapa met uiters weldeurdagte vuurmaak- en braaitoerusting. Baie hout teen 'n baie billike prys reeds daar, so mens hoef dit nie aan te ry nie. Die sementdam is perfek vir somer en ons hond kon baljaar oor 'n groot area omdat dit omhein is. Ons het met die staldeur na ons kamer oop geslaap en kon die sterre uit die bed sien terwyl 'n welkome koel luggie deurwaai. Voortreflike waarde vir geld. Die perfekte Karoowegbreek.

Heerlike wagbreek uit die stad! Dit was baie lekker om te kuier by Middelstevlei Gastehuis! Die rustigheid en stilte was presies waarna ons op soek was om weg te breek uit die besige stad. Die verblyf is baie netjies en goed toegerus met alles wat mens nodig het. Die vars gebakte brood was 'n groot bederf!

Ons het gekom vir 'n naweek en ta-ta gese met koffers vol onvergeetlike memories. Wat is dan nou lekkerder as 'n blikbeker koffie met 'n vars gebakte plaasbroodjie, rustiger as die knetter van 'n vuurtjie onder die helder hemelruim en mooier as die Karoo se eerste more-groet in skakerings van ligpienk en giggel-geel! 'n Stukkie van ons harte het agter gebly in die Moordenaars Karoo, maar ons sal vir seker terugwees om dit te kom haal.

Goeie wegbreek. 'n Wegbreek by Middelstevlei sal ek aan enige iemand aanbeveel. Dit is afgesonder genoeg vir jou om te ontspan (geen sein, geen kragproppe ens.), maar toegerus genoeg om gerieflik te kan bly. Daar is solar-ligte wat atlyd werk en warm water en 'n yskas (wat met gas werk). Die geriewe is ook skoon en die kombuis, braai en leefareas is goed toegerus met alles wat jy nodig het. Sal enige tyd weer gaan. Alhoewel die grondpad geskik is vir lae karre, sal ek aanraai om so 20 minute by jou rytyd te sit. Daar is hier en daar plekke waar jy bietjie stadiger moet ry. Indien jy kwaai honde het, los hulle liefs by die huis. Daar is skape/lammers naby die huis en die boer se honde kom sê ook graag hallo. Ons honde het die sosialisering baie geniet.

Rus vir die siel. Dit was die beste tyd van ons lewe. Rustig, stil, weg van die lawaai van die stad. Soggens maak die mooi sang van die voëls jou wakker met die vars lug van die Karoo. Sal enige tyd terugkeer ️.

Die Karoo-stilte is net wat ons nodig gehad het om bietjie te ontspan. Vanaf ons aankoms tot die einde van ons verblyf was wonderlik. Die eienaars doen ongelooflik baie moeite en die gasvryheid is van die beste gehalte. Die kwaliteit van die beddegoed is hemels.

Perfect, as jy will wegkom van die modern life. Tree terug in tyd. Hierdie was nou net wat die siel nodig gehad het. Van die oomblik wat jou phone geen meer reception het nie, kan jy begin recharge. Die huis was voorberei met net wat a gas nodig het: warm brood op die tafel, en speelgoed vir die kinders, wat jou die kans gee om net vir 5 min. te relax voor julle begin explore. Die omgewing is asemrowend, en asb. vat die tyd om so 'n bietjie rond te loop. Daar is soveel klein hidden gems oral.