Mushashani Boskamp

Selfsorg

Kapasiteit: 12 persone
Alle ouderdomme is welkom
Inkloktyd: 13:00 tot 17:00
Uitkloktyd: 10:00
Adres: Cromer-plaas, N1, Musina, 0900, Limpopo
Vanaf R3 720 per nag, vir 12 mense

Beskrywing

Mushashani Boskamp is op 'n privaat 3100 hektaar-wildplaas, weerskante van die Sandrivier, +-10 km suid van Musina. Dit bied selfsorgverblyf aan gesinne of 'n groep vriende. Dit is ideaal vir natuurliefhebbers en diegene wat uit die gewoel van die dorp of stad wil wegbreek.

Let asb. dat daar 'n 6 km-plaaspad na die kamp is vanaf die N1. Voertuie moet verkieslik 'n redelike grondvryhoogte hê soos 'n SUV om by die kamp te kom, alhoewel gewone sedanmotors of minibusse wat nie te laag is nie ook sonder probleme by die kamp kan kom. Alhoewel 4x4 nie nodig is vir rondry nie, kan dit egter op sekere plekke op die plaas soos byvoorbeeld in sandslote of styl koppies nodig wees, alhoewel 'n mens ook op die meeste plekke met 'n gewone bakkie of SUV sonder 4x4 kan kom.

Die kamp beskik oor 3 rondawels met lugversorging en 2 enkelbeddens elk, asook 'n kamer met 6 beddens en lugversorging wat dus totaal 12 mense kan akkommodeer. Die kamp word as 'n eenheid bespreek maar tariewe hang af van die hoeveelheid gaste en aande. Daar is 2 badkamers waarvan 1 'n stort, toilet en 'n wasbak het en die ander 'n bad, toilet en wasbak het. Daar is ook 'n buitestort met 'n wasbak. Linne word voorsien maar gaste moet hul eie bad- en swemhanddoeke bring. Die kombuis is met 'n stoof, 2 yskaste, 'n 210 L-kisvrieskas, ketel, potte, panne, eetgerei en breekware toegerus. Die braai-area het ingeboude sitplek om die vuurmaakplek en 'n grasdak langs dit. Gaste kan hul eie kampstoele saambring. Hout is te koop of gaste kan hulle eie saambring.

Daar is nie 'n TV of WiFi nie en selfsoonsein is beperk by die kamp.

Die ou plaasdam, sowat 50m van die kamp, is omskep in 'n swemplek genaamd "Die Plasdam". Dit het 'n klipdek met ingeboude sitplek op dit.

Gaste kan self op die bestaande plaaspaaie ry, stap en fietsry. Daar is pragtige uitsigte van verskillende koppies en kranse oor die hele area. Die area en ook die spesifieke plaas is bekend vir 'n groot verskeidenheid fauna en flora, insluitend die majestueuse en misterieuse kremetartbome. Daar is luiperds, klein roofdiere en selfs van tyd tot tyd wildehonde. 'n Groot aantal spesies wild, van die skaars Sharpe's grysbok tot koedoes, elande, njalas, blouwildebeeste, klipspringers ens. sowel as 'n groot verskeidenheid voëls is te sien en menigte ander diere wat die bos bied. Interessante rotsformasies, insluitend die wêreldbekende Sandrivier-gneiss wat pragtig bloot lê in die rivier, is ook te sien.

Mushashani is vir Venda-woord wat losweg beteken: tydelike skuiling vir jagters terwyl hulle jag. Musina beskik oor 'n baie mooi en unieke gholfbaan. Mapungubwe en Tshipise kan maklik tydens daguitstappies besoek word.

Kry ’n Kwotasie