Beskrywing

The Place is 'n lieflike 2-slaapkamer tuinwoonstel in Glentana, gerieflik gemeubileer vir 'n groep van tot 4 mense. Hier kan gaste saans die geluide van die see geniet, en die dolfyne vroegoggend in die see sien speel. Gedurende die migrasieseisoen kan walvisse ook opgemerk word.

Die eenheid is op die grondvloer van 'n dubbelverdiepinghuis geleë en beskik oor 2 slaapkamers met slaapplek vir tot 4 gaste op 'n slag. Die hoofslaapkamer het 'n dubbelbed met 'n see-uitsig en die tweede kamer het 2 enkelbeddens.

Die kombuis is volledig toegerus vir selfsorg met 'n stoof en mikrogolfoond. Daar is 'n braai-area aan die agterkant van die huis weg van die wind.

Die leefarea het 'n TV en sekere DStv-kanale. Die sitkamer en hoofslaapkamer het tuinuitsigte met die see in die agtergrond.

Grootbrak se riviermonding is 'n gewilde visvang- en swemarea. The Place is net 150 meter se stap van die see af. Daar is verskeie besienswaardighede en doendinge in die omgewing soos visvang vanaf die strand of diepseehengel vanaf Mosselbaai, staproetes in die berge, vaar in Wildernis, Die Kango-grotte in Oudtshoorn, 'n aarbeiplaas net voor George en meer.

Grootbrakrivier is sentraal geleë tussen Mosselbaai se hawe, Hartenbos, met die ATKV, en George. George Lughawe is ongeveer 'n kort entjie se ry vanaf die woonstel. Pendeldiens na en van die lughawe kan teen ekstra koste voorsien word.

Troeteldiere word nie toegelaat nie aangesien daar reeds groot honde op die perseel is vir sekuriteit.