Beskrywing

508 The Boulders bied verblyf in 'n luukse dakwoonstel in die veilige The Boulders-kompleks in Ballito. Die eenheid het 'n asemrowende uitsig oor Granny's Pool en die Indiese Oseaan.

Dié woonstel is in 'n strandhuis-styl gemeubileer en dis baie lig en sonnig. Die dakwoonstel bied slaapplek aan 7 gaste en beskik oor 3 slaapkamers, 2 badkamers en 'n oopplan-kombuis, -eetarea en -leefarea. Die eerste slaapkamer het 'n dubbelbed en 'n en suite-badkamer. Die tweede slaapkamer het 2 enkelbeddens en die derde slaapkamer het 'n stapelbed en 'n ekstra enkelbed. Dié 2 kamers deel die tweede badkamer. Al die kamers het plafonwaaiers.

Die kombuis is met 'n stoof, oond, yskas-vrieskas, skottelgoedwasser, wasmasjien, mikrogolf, eetgerei en breekware toegerus. Die sitarea het 'n TV met 'n DVD-speler en DStv. Die leefarea het 2 skuifdeure wat na 'n balkon lei met 'n panoramiese uitsig oor die see. Die balkon het 2 sonstoele en 'n groot tafel met sitplek vir 6.

The Boulders het veilige toegangbeheer met elektriese hekke. Onderdakparkeerplek is beskikbaar en daar is ook addisionele parkeerplek vir besoekers of sleepwaentjies. Die kompleks het gemeenskaplike braaigeriewe in die lieflike tuin en 'n swembad.