Blueview on Silversand

Selfsorg

Soos Gesien op Facebook
Kapasiteit: 10 persone
Alle ouderdomme is welkom
Inkloktyd: 14:00 tot 22:00
Uitkloktyd: 10:00
Adres: Heath-weg 2110, Bettysbaai, 7151, Wes-Kaap
Vanaf R4 899 per nag (plek vir 10)

Beskrywing

Blueview on Silversand is teen die seefront in Bettysbaai geleë, een van die Wes-Kaap se pragtigste vakansiebestemmings. Hierdie luukse vakansiehuis bied 'n see-uitsig van die boonste en onderste verdieping af en is só naby die kuslyn dat gaste die branders kan hoor en die seesproei kan ruik terwyl hulle agteroorsit en ontspan.

Die huis strek oor 2 verdiepings en beskik oor 5 slaapkamers en 4 badkamers wat genoeg spasie vir 10 gaste bied. Die hoofslaapkamer is op die boonste verdieping en het 'n oopplan-uitleg. Daar is 'n koningingrootte-bed en 'n en suite-badkamer met 'n bad, stort, toilet en 'n wasbak. Die tweede en derde slaapkamer het elkeen 'n koningingrootte-bed, die vierde slaapkamer het 'n dubbelbed en die vyfde slaapkamer het 'n stapelbed. Drie van die badkamers word gedeel, waarvan 2 'n stort het, en die derde badkamer het 'n stort-oor-bad.

Die sitarea en kombuis op die boonste verdieping bied toegang tot 'n stylvolle oopplan-area wat na 'n balkon met 'n uitsig oor die see lei. Die kombuis is met 'n stoof, oond, yskas-vrieskas, mikrogolfoond, eetgerei en breekware toegerus. Daar is ook 'n skottelgoedwasser en 'n tuimeldroër. Die eetarea het sitplek vir 8 gaste, asook 'n pizza-oond, en die sitarea het 'n gemaklike sitkamerstel en 'n kaggel.

Daar is 'n aparte TV-kamer met 'n platskerm-TV teen die muur met sekere DStv-kanale. Gratis WiFi word ook voorsien.

Die sandstrand is net 'n hanetreetjie van die verblyf af en kan uit verskeie dele van die huis gesien word. Die mooi voortuin lei na die rotspoele en indien gaste net 'n bietjie verder stap sal hulle by die pragtige Silversands-swemstrand uitkom.

Kry ’n Kwotasie