Beskrywing

Bonfrutti Olyftak is 'n lieflike selfsorgkothuis op 'n vrugte-, wyn- en skaapplaas aan die voet van die Langeberge, langs die R60 tussen Ashton en Swellendam. Bonfrutti bied 'n heilsame wegbreek waar gaste die plaaslewe, vars lug en water uit 'n bergstroom kan ervaar.

Die kothuis bied slaapplek aan 4 volwassenes en 2 kinders en beskik oor 2 slaapkamers en 2 badkamers. Die eerste slaapkamer het 'n koningingrootte-bed en 'n en suite-badkamer met 'n stort. Die tweede slaapkamer het 'n dubbelbed en 'n stapelbed vir kinders en die tweede, aparte badkamer het 'n stort. Linne en badhanddoeke word voorsien.

Die kombuis is met 'n gasstoof, oond, mikrogolf, ketel, broodrooster, eetgerei, breekware, yskas-vrieskas en 'n etenstafel met bankies toegerus. Die sitarea het gemaklike sitplek, 'n binnebraai en 'n TV met DStv-kanale.

Die kothuis lei na 'n onderdakstoep met 'n hangmat, 'n plonspoel met bergwater en 'n vuurput. Parkeerplek is op die perseel beskikbaar. Hiér kan gaste sterrekyk, voëlkyk, plaasdiere sien, bergfietsry, staproetes aandurf, by die restaurant eet, by die plaasstalletjie inloer en wynroetes besoek.