Buffalo Chalets Marloth Park

Selfsorg

Kapasiteit: 15 persone
Alle ouderdomme is welkom
Inkloktyd: 14:00 tot 19:00
Uitkloktyd: 09:00
Adres: Buffelstraat, 4408, Marlothpark, 1340, Mpumalanga
Vanaf R800 per nag (plek vir 5)

Beskrywing

Buffalo Chalets bied selfsorgverblyf in die gewilde Marloth Park op die grens van die Krugerwildtuin naby die Krokodilbrughek. Die ligging is ideaal vir diegene wat daarvan hou om rustig te sit en kyk hoe die wild wei. Let wel, Marloth Park is in 'n malariagebied.

Buffel het slaapplek vir 8 gaste en beskik oor 2 slaapkamers, 2 badkamers, 'n kombuis, slaapbank, yskas, vierplaatgasstoof (sonder 'n oond), mikrogolfoond, broodrooster, eetgerei, breekware en tee- en koffiemaakgeriewe. Die eerste slaapkamer gebruik die badkamer wat 'n bad, stort, wasbak en 'n toilet het. Die tweede slaapkamer is op die boonste verdieping en beskik oor 'n slaapbank, dubbelbed, yskassie en tee- en koffiemaakgeriewe. Hierdie kamer het sy eie badkamer met 'n stort, wasbak en 'n toilet. Albei kamers het lugversorging waarvoor gaste ekstra betaal.

Zebra bied slaapplek aan 2 volwassenes en 2 kinders en beskik oor 'n dubbelbed en 'n stapelbed. Die badkamer het 'n stort, wasbak en 'n toilet. In hierdie chalet is daar 'n ingeboude kombuisie wat toegerus vir selfsorg met 'n yskas, tweeplaatgasstoof, 'n mikrogolfoond, broodrooster, eetgerei, breekware en drankiegeriewe. Daar is lugversorging waarvoor gaste ekstra betaal. Parkeerplek is ongeveer 25 m van die chalet af.

Vlakvark bied slaapplek aan 2 volwassenes en 3 kinders en beskik oor 2 kamers. Die eerste kamer is op die onderste verdieping en het 'n dubbelbed en 'n klein, ingeboude kombuisie wat volledig toegerus is vir selfsorg. Die gedeelde badkamer het 'n stort, wasbak en 'n toilet. Op die tweede verdieping is daar nog 'n slaapkamer wat met 'n seiltjie afgekamp is en 'n dubbel- en enkelbed het. Daar is lugversorging waarvoor gaste ekstra betaal.

Daar is nie 'n TV, radio of internet in die eenhede nie. Lugversorging word voorafbetaal. Elke chalet het 'n braai-area en 'n plonspoel. Die plonspoel is net vol wanneer daar nie waterbeperkings in Marlothpark is nie.

Marlothpark het 2 winkels, 2 hardewarewinkels, 'n kuriowinkel, 2 drankwinkels, 'n groot kroeg en verskeie restaurante. 'n Swembad, klimraam en speelarea, wassery, roomyswinkel, vulstasie, 2 karwasserye, waterwinkel, 'n bakkery en 'n slaghuis is ook beskikbaar.

Kry ’n Kwotasie