Beskrywing

Die Berghut is 3 km met in die berge in, onder 'n groot rots geleë. Dis 16 km vanaf Zastron in die Vrystaat op die plaas Groenhoek. Die hut bied 'n pragtige uitsig op die Malutiberge in die ooste en oor Lady Grey in die suide.

Die verblyf is vir selfsorg toegerus en beskik oor 'n dubbelbed en 2 enkelbeddens en 'n netjiese badkamertjie. Daar is 'n gasstoof, geyser, yskas en batteryligte, asook 'n puttoilet met 'n ongelooflike uitsig!

Hierdie afgesonderde wegbreekplek is perfek om in die natuur, met regte kampvure en 'n sterrehemel, die nag in te wag. Aangesien daar geen elektrisiteit is nie, is die ervaring selfs nog meer besonders. Die Berghut is 'n rustige, stil toevlugsoord vir die hele gesin!

Die avonturier kan heerlike verrassings te wagte wees op die voetslaanroete van 7 km. Ander geriewe sluit 'n braai-area en 'n plaasdam waar gaste kan swem in.