Beskrywing

Die Skooltjie is ‘n knus, gerieflike kothuis vol karakter en stories. Dié gerestoureerde plaasskool is op ‘n skaapplaas in die Onder & Tankwa-Karoo, ‘n area tussen Ceres en Sutherland, wat bekend is vir sy skoon, oop nagte met helder sterre, rustige Karoo-aande en die wêreldbekende SALT-teleskoop.

Die Skooltjie is goed toegerus met geriewe soos Wi-Fi en sonkrag, warm water, 'n gasbrander, asook 'n houtstoof, mikrogolfoond, yskas, braaigeriewe en al die basiese benodigdhede. 'n En suite-dubbelslaapkamer lei na ’n ruim badkamer met ’n bad, pragtige instapstort en toilet. 'n Gasgeiser sorg vir heerlike warm water.

Die Skooltjie bied die ideale Karoo-ervaring in die uitgestrekte veld en ongerepte natuur wat opwindende geleenthede vir nagfotografie bied. Dit bied ’n uitsig oor die Tankwa-rivier en die hange van die Roggeveldplato in die verte.

Daar is verskeie aktiwiteite, soos kleinwild- of voëlkyk, stap, fietsry of piekniek op die klipbanke wat gaste kan geniet. Die indrukwekkende passe soos die Ouberg-, Gannaga- en Verlatenkloofpasse, in die omgewing kan met groot voertuie aangedurf word. Die nabye Tankwa Nasionale Park is bekend vir sy inheemse vetplante en wild en gaste kan by die Tankwa-padstal gaan inloer.