Beskrywing

Hadida Huisie is 'n selfsorgwoonstel met 'n privaat ingang op die eienaar se perseel in Van Riebeeckpark in Kemptonpark. Dit is ideaal vir 'n klein gesin, 'n paartjie of sakereisigers.

Dié eenheid het slaapplek vir 2 volwassenes en 2 kinders en beskik oor 'n oopplan-slaaparea, aparte kombuis en 'n en suite-badkamer. Die slaapkamerarea het 'n dubbelbed, dubbelslaapbank vir kinders, lessenaar met 'n stoel en 'n plafonwaaier. Die badkamer het 'n stort, toilet en 'n wasbak. Linne en badhanddoeke word voorsien.

Die kombuis is met 'n eenplaat-induksiestoof, waaier braai, mikrogolfoond, ketel, broodrooster en 'n yskas toegerus. Daar is 'n TV met stroomkanale en gratis WiFi is beskikbaar.

Vir die fiksheidsbewuste is daar n stapmeul (treadmill) en n veilige omgewing vir die buitelig stapper of drawwer. Daar is ook 'n heerlike braai-area en swembad en gebruik daarvan kan vooraf gereël word.

Veilige parkeerplek is agter 'n heining voor die ingang beskikbaar. Opgeleide klein tot middelslag hondjies is welkom.

Hierdie verblyf is naby Emperors hotel en casino, lughawe geriefswinkels, eetplekke en die R25. Van Riebeeckpark is ook sentraal vanaf Johannesburg en Pretoria. Die Rietvlei natuur reservaat is minder as 30 minute se ry vanaf Hadida Huisie.