Hippo's Honk @ Kruger

Selfsorg

Kapasiteit: 6 persone
Geen kinders onder 7
Inkloktyd: 14:00 tot 23:00
Uitkloktyd: 10:00
Adres: Seekoei 3340, Marlothpark, Malelane, 1320, Mpumalanga
Vanaf R3 540 per nag (plek vir 6)

Beskrywing

Hippo's Honk @ Kruger is 'n luukse selfsorg-vakansiehuis in Marlothpark met sonkrag. Die huis is slegs 50 m vanaf die draad van die Krugerwildtuin en net 20 km vanaf die naaste ingang na die Krugerwildtuin by die Krokodilbrughek. Hier kan gaste in die bos ontspan en besoeke van die verskeidenheid vrylopende wild geniet insluitend sebras, blouwildebeeste, kameelperde, koedoes, rooibokke, vlakvarke, bosbokke, muskeljaatkatte en nagapies.

Hierdie dubbelverdieping-vakansiehuis bied slaapplek aan slegs 6 gaste en beskik oor 3 slaapkamers, 3 badkamers, 'n kombuis, opwasarea, eetkamer en sitkamer. Die hoofslaapkamer is op die boonste verdieping en het 'n koningingrootte-bed en 'n en suite-badkamer met 'n stort, wasbak en toilet. Die tweede slaapkamer het 'n dubbelbed en daar is 'n stort, wasbak en toilet in die badkamer reg langsaan. Die derde slaapkamer het 'n koningingrootte-bed en 'n en suite-badkamer met 'n stort, wasbak en toilet. Daar is ook 'n buitestort en 'n buitetoilet.

Elke slaapkamer en al die leefvertrekke het voorafbetaalbare lugversorging. Daar is ook elektriese waaiers wat met afstandbeheerders werk in elke vertrek. Daar is gehaltematrasse op elke bed en gehaltelinne en badhanddoeke word voorsien.

Die oopplan-kombuis is met 2 yskaste, 'n gasstoof, elektriese oond, mikrogolfoond, broodrooster, basiese eetgerei, breekware en 'n ketel toegerus. Daar is ook 'n etenstafel met 6 stoele. Die leefarea het 'n sitkamerstel en 'n platskerm-TV met Netflix en YouTube, asook luike wat oopmaak na die swembadarea.
Die glasskuifdeur en luike lei na die stoep met 'n pragtige randvloeiswembad en 'n braai-boma met 'n vuurput.

Die boonste dek van die huis het braaigeriewe en 'n etenstafel met 6 stoele asook 'n yskas slegs vir drinkgoed. Die huis het ook muskietskerms voor alle vensters en deure. Gratis WiFi is beskikbaar en gaste het toegang tot gratis, veilige parkeerplek. Daar is 2 voerbakke voor die huis waar kos vir die diere gegee kan word.

Kry ’n Kwotasie