Beskrywing

Rocky Bay Resorts is aan die skilderagtige Suidkus van KwaZulu-Natal, minder as 'n uur vanaf Durban geleë. Lieflike somers, gematigde winters en 'n ligging tussen goue strande, inheemse woude en golwende heuwels maak Rocky Bay Resorts die ideale vakansiebestemming regdeur die jaar!

Rocky Bay Resorts het akkommodasie wat in al jou behoeftes sal voorsien, asook baie staanplekke en see-uitsigte, asook 'n konferensiesentrum. Dit is alles in 'n lowerryke omgewing teen die kus geleë. Daar is baie aktiwiteite in die area om almal, jonk én jonk van gees, besig te hou: diepseevisvang, snorkel, jetski, gholf, bergfietsry, voetslaan, wildbesigtiging in wildparke, kasino en skubaduik. Dan praat ons nog nie eers van die karavaanpark en lodge se klimrame en swembaddens vir die jongspan nie.

Kom ontspan gerus op die afgesonderde strande en in rustige rotspoele naby Rocky Bay. Rocky Bay is ook naby Scottburgh vir diegene wat inkopies wil doen, 'n heerlike maaltyd by 'n restaurant wil geniet, of vinnig met wegneemetes die hongerpyne wil demp.