Beskrywing

Rus & Herlaai is 'n semi-losstaande huis in Boggomsbaai, 'n kusdorpie 26 km van Mosselbaai af. Die dorp val binne die grense van die Fransmanshoek Bewarea en spog met 'n asemrowende goue strand en inheemse plante en bome en 'n klein verskeidenheid wild wat vrylik rondloop.

Dié dubbelverdiepingwoonstel beskik oor 2 slaapkamers met 2 badkamers en het slaapplek vir 5 gaste. Die slaapkamers is op die grondverdieping en het elk 'n dubbelbed. Daar is storte in die badkamers. Beddegoed en handdoeke word voorsien en daar is ook 'n wasmasjien en wasgoeddraad.

Die oopplan-leefarea en kombuis is op die boonste verdieping. Die kombuis is met 'n yskas, gas oond, stoof, mikrogolfoond, ketel en 'n skottelgoedwasser toegerus. Die leefarea het 'n etenstafel met sitplek vir 6 gaste, 'n sitkamerstel en 'n TV. Dit bied ook toegang tot 'n gemeenskaplike dek met eie etenstafel en braaigeriewe. Die eenheid het 'n omsetter en batterye wat die noodsaaklike toestelle en ligte gedurende beurtkrag ondersteun.

Daar is 'n kafee in Vleesbaai vir die algemene benodigdhede, maar die naaste supermark is in Mosselbaai.

Doendinge in Boggomsbaai sluit swem, hengel, gholf, tennis, voetslaan, voëlkyk en daguitstappies na dorpe in die omgewing soos Mosselbaai en Oudtshoorn in.