The Stargazing Cube

Selfsorg

Soos Gesien op Instagram
Kapasiteit: 2 persone
Geen kinders
Inkloktyd: 14:00 tot 19:00
Uitkloktyd: 10:00
Adres: Plaas 438, Stormsrivier, Tsitsikamma, 6308, Oos-Kaap
Vanaf R6 600 per nag, vir 2 mense

Beskrywing

The Stargazing Cube is in die hartjie van die Misty Mountain Reservaat in Tsitsikamma geleë. Dit is 'n unieke en moderne eenheid wat 'n eiesoortige sterrekyk-ervaring bied. Die blokvormige verblyf is in 'n afgesonderde en privaat area geleë en word deur pragtige natuurskoon omring. Dit is ideaal vir 'n rustige, romantiese wegbreek buite die stadsgedruis.

Die blok het 'n glasdak en -vensters wat 'n onbelemmerde sterrehemel-uitsig verseker en die binnekant is stylvol versier. Dit het 'n verskuifbare koninggrootte-bed, gemaklike sitplek en 'n aparte badkamer met 'n stort, toilet en 'n wasbak. Daar is ook 2 losstaande baddens langs mekaar op die houtdek. Indien gaste die meeste van die sterrekyk-ervaring wil maak, kan hulle die bed, wat met 'n afstandbeheer werk, tot op die dek skuif.

Gaste kan op die privaat houtdek ontspan en die pragtige uitsig op die berge en oor die woud bewonder. Die houtdek het 'n hangmat, pootjiesbad, 'n braai-area en buitesitplek. Die kombuisie is met 'n tweeplaat-gasstoof, yskassie, mikrogolfoond, eetgerei en tee- en koffiemaakgeriewe toegerus.

WiFi, lugversorging en battery-lanterns is beskikbaar. Gaste het toegang tot 'n swembad en 'n restaurant wat op die Misty Mountain-perseel geleë is. Hiér kan gaste die natuurskoon geniet, die nabygeleë voetslaanroetes verken of sommer net buite ontspan en die berguitsig bewonder.

Kry ’n Kwotasie