Beskrywing

Vrymans Place is 'n nuutgeboude selfsorghuis met 'n asemrowende uitsig op Kogelberg vanaf die voorstoep. Hierdie huis is in 'n stil area in Bettysbaai geleë en bied gerieflike verblyf wat ideaal vir 'n gesin of groep vriende is. Dit is ook naby die strand.

Dié huis het slaapplek vir 4 gaste en beskik oor 2 slaapkamers met deure wat na die agtertuin lei, 2 badkamers en 'n oopplan-kombuis, -eetarea en -sitarea. Die hoofslaapkamer is stylvol gemeubileer en het 'n dubbelbed en 'n en suite-badkamer met 'n stort, wasbak en 'n toilet. Die tweede slaapkamer het 2 enkelbeddens en die gaste van hierdie slaapkamer maak van die gastebadkamer met 'n bad, stort, wasbak en 'n toilet gebruik. Alle linne en handdoeke word voorsien.

Die groot oopplan-kombuis is met 'n yskas-vrieskas, gasstoof- en oond, mikrogolfoond, basiese eetgerei, breekware en koffie- en teemaakgeriewe toegerus. Daar is ook 'n eiland met stoele. Die kombuis lei na 'n etenstafel met sitplek vir 6 wat verder na die sitarea lei. Die sitarea het gemaklike rusbanke en 'n TV. Gaste het toegang tot gratis WiFi en die huis het 'n UPS.

Die stoep het 'n ingeboude braai wat Bettiysbaai se winde kan weerstaan. Gaste het toegang tot veilige parkeerplek op die perseel en die huis het 'n alarmstelsel.

Bettysbaai is 'n klein kusdorpie in die Wes-Kaap van Suid-Afrika. Dit is vir sy pragtige strande, natuurreservate en buitelugaktiwiteite soos voetslaan, visvang en voëlkyk bekend. Die dorp is ook die tuiste van 'n kolonie van Afrika-pikkewyne, wat by die Stony Point-natuurreservaat besigtig kan word.