Beskrywing

ZebetsView is 'n selfsorg-eenheid op die eienaar se perseel in Stellenbosch, 'n geskiedkundige dorp in die Wes-Kaap wat deur majestueuse berge omring word. Die dorp is in die hartjie van die Kaapse Wynland, die oudste en langste wynroete ter wêreld en een van die grootste toeristebesienswaardighede in die Wes-Kaap met meer as 145 wynlandgoedere.

Dié unieke en privaat eenheid is bo die motorhuis, heeltemal versteek vanaf die straat. Dit het slaapplek vir 3 gaste in 1 slaapkamer. Die solderstyl-slaapkamer word met 'n trap bereik en het 'n koningingrootte-bed en 'n enkelbed. Daar is 'n stort in die badkamer.

Die oopplan-leefarea en -kombuis is onder. Die kombuis is goed toegerus met 'n yskas-vrieskas, gas- en elektriese stoof, oond, mikrogolf en kookgerei. Die eenheid het 'n Morso-kaggel, lugversorging, 'n TV met DStv, gratis WiFi en veilige parkeerplek. Daar is 'n gemeenskaplike swembad.

Stellenbosch bied doendinge soos gholf, wynproe, kanovaart, voetslaan, 4x4-roetes, abseil en bergfietsry.