Heerlike verblyf met die beste see-uitsigte op Jongensfontein. Ons het vanjaar Vadersdag en 'n verjaarsdag in Jongensfontein (Frimakin) gevier. Frimakin is 'n besonderse, ruim en goed toegeruste huis. Dit het werklik alles wat 'n mens mag nodig kry. Ons was geseën met goeie weer. Vervolgens het ons die meeste tyd op die groot dek (voor die huis) spandeer en die onverbeterlike see-uitsigte geniet. Baie dankie aan Fritz, sowel as Debi, vir hulle vriendelike hulp om ons verblyf so aangenaam moontlik te maak.

Rus en vrede vir my siel. Dis ons tweede keer by Frimakin. Ons het definitief ons gunsteling plek ontdek en sal elke jaar terugkeer. Daai uitsig en hout dek maak dit die moeite werd. Dankie Fritz dat jy elke keer so ingestel is om ons gemaklik te laat voel en alles het wat ons nodig het.

Was 'n besonderse ervaring. Baie gerieflike en goed toegeruste huis, met hope spasie.

Aangename verblyf, sal weer terug gaan. Frimakin het gedien as ons Paasnaweek wegbreek, wat twee gesinne met jong kinders akkommodeer het. Die positiewe van ons verblyf het ingesluit die ligging, wat pragtige uitsigte bied, en 'n volledig toegeruste kombuis met al die nodige geriewe. Die onderdak braai-area het 'n gemaklike ruimte verskaf wat teen die wind en ander elemente beskerm is, en die volop kamers het verseker dat almal hul eie ruimte gehad het. Daarbenewens het die voorsiening van bordspelle die kinders ook besig gehou. Iets om wel bewus van te wees is dat daar 'n merkbare muf reuk was, moontlik a.g.v. die feit dat dit meestal toe staan. Dit was nie vir ons 'n probleem nie en het dadelik verbeter na ons die vensters oopgemaak en so ver moontlik oop gelos het, maar kan wel problematies wees vir iemand wat sensitief is vir so iets. Ongelukkig was die WiFi onbeskikbaar gedurende ons verblyf, en a.g.v. die lang naweek kon dit nie reg gemaak word nie. Op 'n meer praktiese noot het ons 'n voorval ondervind waar een van die kinders per ongeluk teen die muur geval het, en aangesien daardie gedeelte nie uit baksteen nie, maar uit "fibre board" gebou is, het hy 'n gat in die muur veroorsaak. Gelukkig was daar 'n nabygeleë bouer wat die probleem kon aanpak nadat ons vertrek het, met die goedkeuring van die eienaar. Alhoewel hierdie klein ongerieflikhede voorgekom het, was ons verblyf by Frimakin aangenaam, en het dit 'n ontspanne wegbreek met 'n paar hanteerbare struikelblokke gebied.

Ons kom weer. Dit was fantasties. Alles was daar wat benodig word in 'n normale huis en meer. Welldone Fritz.

Ongelooflike uitsig! Het stilte, ruimte en gerief hier gevind. Heerlik gerus in 'n ruim huis met ongelooflike uitsig. Die huis het alles gebied wat ons nodig gehad het.

Uitstekend. Alles en nog meer, vanaf aankoms was alles op sy plek, netjies en skoon. Frimakin is 'n plek waar jy net jou kos en klere inpak. Die huis is toegerus met alles wat moontlik nodig kan wees, van 'n skerp mes en 'n groot vrieskas tot braairoosters. Ek kan beslis Frimakin aanbeveel vir 'n kort kuier tot 'n maand en selfs langer verblyf, vir 1 persoon, 2 persone of selfs 8 persone. 10/10. Baie dankie.

Heerlik gebly by 'n uitstekende plek. Die huis bied 'n pragtige uitsig oor die baai en is ten volle toegerus en is baie veilig. Die Huis is in 'n groen gordel geleë en ons het bokkies, skilpaaie, verskeie voëlsoorte en vanaf die dek selfs walvisse gesien. 'n Muskeljaatkat het ons ook besoek.

Onvergeetlike familiebyeenkoms. Ons was 'n groot groep van 10 persone en die huis was meer as ruim genoeg om almal te akkommodeer. Daar was altyd warm water en die kombuis is baie goed toegerus. Die pragtige uitsig het dit 'n onvergeetlike kuier gemaak. Baie dankie Fritz vir jou gasvryheid. Baie dankie vir ons lekker familie kuier in jou huis. Almal was 100% tevrede met die blyplek. Dit het die beste toegeruste kombuis vir vakansie. Groete, Lana en die Jonker familie