Knysna Family Home

Selfsorg

Kapasiteit: 12 persone
Alle ouderdomme is welkom
Inkloktyd: 14:00 tot 19:00
Uitkloktyd: 10:00
Adres: Kennetstraat 9, Knysna, 6571, Wes-Kaap
Vanaf R16 000 per nag (plek vir 12)

Beskrywing

Knysna Family Home is 'n pragtige en ruim vakansiehuis wat in 'n stil area van Knysna geleë is. Dit is ideaal vir 'n groot gesin of 'n groep vriende aangesien die eiendom met 'n verhitte soutwaterswembad, sowel as 'n houtvuurwarmbad spog.

Dié uitgestrekte eiendom bied slaapplek aan 12 gaste en beskik oor 4 slaapkamers in die hoofhuis, sowel as 'n woonstelletjie. Die hoofslaapkamer in die huis het 'n koninggrootte-bed en 'n sitarea met 'n TV. Dit het ook 'n en suite-badkamer met 'n instapstort. Die tweede slaapkamer het 'n koningingrootte-bed, die derde slaapkamer het 'n tripelstapelbed en die vierde slaapkamer het 'n stapelbed. Gaste in hierdie slaapkamers deel die ander 2 badkamers wat onderskeidelik 'n stort en 'n bad het. Die woonstelletjie beskik oor 'n slaapkamer met 'n koningingrootte-bed, 'n TV-kamer met 'n uittrekbank en 'n badkamer met 'n stort. Daar is ook 'n leefarea met 'n dubbelslaapbank en 'n kombuisie wat met 'n tweeplaatstoof, oondjie en 'n yskassie toegerus is.

Die oopplan-leefarea in die hoofhuis het 'n stylvolle kombuis wat met 'n gasstoof, elektriese oond, mikrogolf, yskas-vrieskas, eetgerei en breekware toegerus is. Daar is ook 'n eiland met stoele. Die opwaskamer het 'n skottelgoedwasser, wasmasjien en 'n tuimeldroër. Die kombuis lei na 'n etenstafel en 'n knus sitarea met gemaklike sitplek, 'n kaggel en 'n platskerm-TV teen die muur. Gratis WiFi is beskikbaar.

Beide die hoofleefarea en woonstelletjie lei na 'n stoep wat gedeeltelik onderdak is, met meubels, 'n tafel met stoele, Weber-braai, sowel as 'n ingeboude braai. Dié stoep lei na 'n lieflike kuierarea met 'n sonverhitte swembad, sonstoele, 'n kroeg en 'n sitarea wat perfek is vir skemerkelkies. Verder is daar 'n vuurput langs die swembad en 'n kinderspeelarea met 'n klimraam en 'n trampolien.

Kry ’n Kwotasie