Beskrywing

L’Escalier is 'n ruim strandfrontwoonstel met slaapplek vir 9 gaste in Amanzimtoti.

Dié drieslaapkamerwoonstel op die derde verdieping kyk oor die see en strand en word met 'n hysbak of trappe bereik. Die hoofslaapkamer het 'n koningingrootte-bed en 'n enkelbed. Die en suite-badkamer het 'n stort. Die tweede slaapkamer het 'n dubbelbed en die derde slaapkamer het 2 stapelbeddens. Dié kamers deel 'n badkamer met 'n bad. Badhanddoeke word voorsien en gaste moet asb hul eie swemhanddoeke saambring.

Die oopplan-kombuis is met 'n stoof, mikrogolfoond, yskas, wasmasjien en tee- en koffiemaakgeriewe toegerus. Gaste kan hul maaltye by die etenstafel geniet.

Gaste kan ook in die sitkamer of op die balkon met 'n ingeboude braai en 'n pragtige see-uitsig ontspan. Daar is 'n teleskoop waarmee gaste na die dolfyne en walvisse gedurende die seisoen kan kyk. 'n Skoonmaakdiens kan op versoek en teen 'n ekstra koste gereël word en troeteldiere is welkom indien dit vooraf gereël word.

Die kompleks het 'n gemeenskaplike swembad en kinders moet ten alle tye onder toesig wees.

L’Escalier is 75 m vanaf die strand en 140 m vanaf Toti Mall met verskeie winkels en restaurante. Amanzimtoti bied 'n verskeidenheid restaurante en winkels en doendinge soos visvang, duik, snorkel en branderplankry. Gaste kan tussen Julie en Augustus die sardienloop dophou of die Amanzimtoti Bird Sanctuary, die Ilanda Wilds Natuurreservaat, Splash Water World en vele meer besoek.