Beskrywing

Frost House is een van die oudste geboue in Clarens en dateer uit ongeveer 1920. Die huis is sorgsaam deur die huidige eienaars gerestoureer en is in Kerkstraat naby die dorpsmeent oorkant die polisiestasie. Dis stapafstand vanaf restaurante, kroeë, kunsgalerye en 'n supermark.

Die huis het 2 slaapkamers, elk met 'n en suite-badkamer met 'n stort, wasbak en toilet. Elke kamer het 'n koningingrootte-bed met gehaltelinne. Daar is 'n oopplan-kombuis, -sitarea en -eetarea, asook 'n Godin-houtstofie wat die huis lekker warm maak in die winter. Die kombuis is toegerus met 'n gasstoof, elektriese oond, mikrogolf, ketel, broodrooster, yskassie met 'n vrieshokkie, en 'n skottelgoedwasser.

Verder het die huis 'n TV met DStv, asook ingeboude braaigeriewe, braaigereedskap en 'n kuierstoep met 'n pragtige uitsig op die berge daar naby. Parkeerplek is beskikbaar onder 'n motorafdak en daar is ruimte in die oprit vir 'n tweede voertuig.

Frost House was destyds 'n eenvoudige huis wat uit gegote sandsteen gebou is. Dit is later onder toesig van die argitek Jaap Boonstra gerestoureer om dit by 'n moderne, ontspanne leefstyl aan te pas, maar tog ook die historiese karakter te behou. Die voorste fasade lyk dieselfde as bykans 100 jaar gelede. Die tuin is pragtig uitgelê met hoofsaaklik inheemse plante en veldgrasse eie aan die Oos-Vrystaatse Hooglande en lok talle wildlewe en voëls.