Beskrywing

SANParks Storms River Mouth Camping Sites skuil in Tsitsikamma, die "plek van baie water", in die Tuinroete Nasionale Park. Hier breek die Indiese Oseaan se branders heel dag teen die rotsagtige kuslyn en oeroue riviere kalwe paadjies na die see al langs steil, klipperige ravyne.

Die hartjie van die park strek sowat 5 km na die see en is 'n beskermgebied vir spesies wat leef en beef in die park se tussengety-gebied, op die seeriwwe en in die oseaan. Dolfyne baljaar graag in die branders en die rustige reus van die oseaan, die suidelike noordkaper, kom lê besoek af tydens die paarseisoen. Die swarttobie, 'n rooidata-spesie, is een van Suid-Afrika se mees bedreigde voëlspesies en verskeie broeipare se neste is langs die park se rotsagtige kuslyn te sien. Die pragtige Knysnaloeries met hulle growwe geroep is ook gereeld in die woud te sien. Die Kaapse groototter is skaam en ontwykend en jag graag krappe langs die park se kus. Die blouduiker en bosbok is selde te sien, maar kan soms rondom die kampvuur gewaar word.

Tsitsikamma het 2 ruskampe, elk met hul eie bekoring: Storms River Mouth Rest Camp en De Vasselot Rest Camp in Nature's Valley. Die Storms River Mouth Rest Camp is 615 km vanaf Kaapstad, 195 km vanaf Gqeberha (Port Elizabeth) en 68 km vanaf Plettenbergbaai.

Kom geniet pragtige see-landskappe wat met die digbegroeide inheemse woude kontrasteer, volg 'n stap- of voetslaanroete, loop oor die hangbrug of onderneem 'n bootvaart - alles met die Storms River Mouth Rest Camp as beginpunt.

Kies uit 100 kampeerplekke, almal 'n paar tree vanaf die see en voorsien van elektrisiteit, gemeenskaplike ablusiegeriewe en wasgoedgeriewe.