Beskrywing

Vrolikheid is 'n dubbelverdieping-selfsorghuis in Buffelsbaai en die naam pas perfek by die atmosfeer wat hiér geskep word. Die huis is een van die heel eerste vissershuise in die dorp en is opgeknap om die warm strandkothuis-atmosfeer te behou. Die geelhout van die oorspronklike kothuis is gebruik om die huis se vloer en meubels te maak. Verder bied dié huis 'n panoramiese uitsig oor die see en dit is net 2 minute se stap vanaf die strand.

Die huis bied slaapplek aan 8 gaste en beskik oor 4 slaapkamers, 2 badkamers en 'n oopplan-kombuis, -eetarea en -sitarea. Daar is ook 'n vyfde slaapkamer met 'n dagbed op die boonste verdieping.

Die hoofslaapkamer, kombuis, eetarea en sitarea is op die boonste verdieping geleë. Die hoofslaapkamer het 'n koninggrootte-bed en 'n en suite-badkamer met 'n stort, toilet en 'n wasbak. Die kombuis is met 'n yskas-vrieskas, stoof, oond, mikrogolfoond, ketel, broodrooster, wasmasjien en 'n tuimeldroër toegerus. Langs die kombuis is daar 'n dek met braaigeriewe en 'n uitsig oor die tuin en die see. Die eetarea het 'n etenstafel met bankies en sitplek vir 10 gaste. Die sitarea het gemaklike rusbanke en 'n TV. Die leefarea lei na 'n balkon met buitemeubels, sitplek en 'n uitsig oor Buffelsbaai en die see aan die linkerkant.

Daar is 3 slaapkamers, 'n badkamer en 'n linnekas op die onderste verdieping. 2 slaapkamers het koningingrootte-beddens en die laaste slaapkamer het 2 enkelbeddens. Die badkamer het 'n bad, toilet en 'n wasbak. Al 3 slaapkamers lei na 'n beskutte stoep met 'n see-uitsig.

Die huis is een van die min huise in die dorp wat 'n groot tuin het, wat dit die ideale vakansiehuis vir 'n gesin maak. Daar is 'n parkeerplek vir 1 voertuig en genoeg parkeerplek in die tuin vir 'n tweede voertuig. Die tuin word deur 'n kort heining omring. 'n Omsetter en 'n battery is in die geval van beurtkrag beskikbaar.