LekkeSlaap se webtuiste is vol pragtige plekkies waar jy kan wegbreek, ontspan of op ’n avontuur gaan. Almal kort ’n heerlike nagrus na ’n bedrywige dag van vakansie hou, so ek het ’n paar van dié lekke lêplekkies met die mooiste beddens gaan soek waar jy beslis sal kan lekke slaap. Kliek gerus op die foto’s om meer uit te vind.
Dié heerlike bed is in Smithfield se natuurskoon tussen die asemrowende heuwels en valleie van die Caledonrivier geleë. Hier, in die hartjie van die Vrystaat, kan jy na ’n dag van fietsry, voetslaan of opwindende wildritte jou kop neerlê.
Ontsnap uit die beskawing en kom bly in Fouriesburg in die Drakensberge. Dié beeldskone bed is op ’n werkende plaas op die grens van die Vrystaat en Lesotho en spog met die mooiste uitsigte.
Dié lodge spog met ’n pragtige uitsig oor die Indiese Oseaan, inheemse bos en berge. Jy kan ’n outentieke Afrika-atmosfeer hiér ervaar en ’n romantiese skemerkelkie op die houtstoep geniet terwyl jy die beeldskone uitsig geniet.
Die geboue weerspieël die verskillende boustyle van die Kaap-Kolonie wat is die 1800’s gewild was. Smul aan ’n heerlike ontbyt, middag- of aandete by De Oude Martha Restaurant.
Kom ontspan in dié luukse kamer in die hartjie van die Sondagsriviervallei naby aan die Addo-Olifantpark. Die chalets by die lodge spog met houtdekke wat oor die sitrusboorde en luisterryke platteland uitkyk.
Verlustig jou in die sagte bosgeluide en sonopkoms van die Zululand Renosteroord wat spog met ongerepte bosveld en rivierwoud en die Umsunduzerivier en Lebomboberge in die verte.
Kom seil weg in jou drome op dié wonderskone bed in ’n historiese gebou net buite Kaapstad se stadskern. En wanneer jy ontwaak, gaan loer sommer in by Old Biscuit Mill net om die draai.
Kom kyk hoe baljaar die walvisse aan die kus van Julie tot November terwyl jy in dié heerlike bed ontspan. Die vierster-akkommodasie spog met ’n uitsig oor die Helderberge en Valsbaai.
Dié bekoorlike bed is in een van die retro-karavane in ’n stukkie hemel in George. Gaan op ’n “Happy Hour”-toer na die aarbei-, buffel- of wynplaas terwyl jy ’n glasie wyn of bier geniet.
Dié gastehuis is een van die eerste huise wat in 1937 in die hartjie van die Stad van Goud gebou is. Die huis is versier met helder skilderye en Europese, antieke geel- en stinkhout Afrikana-meubels. Daar is ook Victoriaanse en Italiaanse elemente in die huis.
Dié beeldskone bed is in ’n steendorp-paradys met intieme argitektuur en ’n samesmelting van rots, koidamme, inheemse plante en die kontemporêre leefstyl in die hartjie van die streek.
Godiva bied plattelandse gasvryheid en ‘n samevloeiing van ’n Franse styl en die bosveld terwyl ’n ontspanne, Mediterreense atmosfeer op jou wag. Die kamers het privaat balkonne in welige tuine en spog met ’n tikkie glans.
Dié pragtige lodge is van plaaslike riet en klip gebou. Slaap onder die Suidelike sterre en ontwaak met die oggendkoor teen sonsopkoms. Dit is beslis ’n belewenis.
Net 3 km buite Lydenburg met ’n beeldskone uitsig oor die Long Tom Pass lê dié voëlliefhebber-paradys in ’n welige tuin. Dit lyk net perfek vir ’n prinses!
Die bed is romanties weggesteek in die inheemse woud met verskeie wandelpaaie wat daardeur vleg. Elke kamer het ’n privaat houtdek en ’n kaggel. Jy moet self die watervalle, staproetes en voëlkykroetes, romantiese pieknieks en spa-behandelings kom beleef.
Wie sal nie in die lekke sonnetjie wil ontspan en luister na die voëltjies wat sing nie? Stap net ’n paar meter na die rivier en luister hoe die water oor die klippe vloei.
Dié pragtige gastehuis is in ’n klein Karoodorpie langs die N1/N10-kruising en spog met ’n uitsig oor die kerkgebou van die voorstoep af. Die kamers is ruim en eenvoudig versier, maar steeds elegant met egte Karoo-elemente.
Geniet ’n heerlike ontbyt op die stoep na ’n heerlike nagrus in dié bed aan die oewer van die Oranjerivier. Dié luukse gastehuis spog met Charlotte Rhys-badprodukte.
Dit lyk omtrent of dié beddens in ’n glanstydskrif hoort. Gaan besoek die lekke lêplekkies en slaap self in die snoesige beddens.
Watter plekke het jy al besoek wat sulke mooi beddens het? Vertel ons hier onder!
