Buiten Tafelberg, legio wynplase en ’n kuslyn wat die Atlantiese en Indiese Oseaan insluit, het die Wes-Kaap ook ’n rits dorpe met naamgenote in Brittanje, die Verenigde State van Amerika en selfs in Nieu-Seeland. Daarom het LekkeSlaap 10 Wes-Kaapse dorpe uitgesoek wat eweknieë in die buiteland het en ons deel graag ’n handjie vol ooreenkomste en verskille wat jou dalk net sal verstom!
Llandudno
Llandudno lê teen die Atlantiese Seekus en bied ’n beskutte baai aan die voet van die Twaalf Apostels omring deur groot rotse. Dié kusbuurt kry sy naam by Wallis se grootste kusoord wat op sy beurt na die beskermheilige St Tudno vernoem is.
Blyplekke in Llandudno
Malmesbury
Malmesbury vorm die hartjie van die Swartland en word omring deur koringlande. Soos menige plattelandse dorpie het Malmesbury rondom die Moedergemeente Kerk ontwikkel en boorlinge het ’n kenmerkende bry. Dié dorpie is vernoem na die graaf van Malmesbury en sy naamgenoot is ’n markdorpie en plaasgemeenskap in die graafskap, Wiltshire, Engeland.
Blyplekke in Malmesbury
McGregor
McGregor is ’n plaasdorpie sowat 150 kilometer van die Moederstad af waar die meeste produkte plaaslik geproduseer word. Dit vorm ook die eindpunt van die bekende Boesmanskloof-voetslaanroete wat buite Greyton begin. Daarenteen is McGregor se naamgenoot ’n stad in Texas, VSA, wat oor twee distrikte strek.
Blyplekke in McGregor
Philadelphia
Dié luilekker dorpie is naby Kaapstad en het verskeie fynproewersrestaurante ─ ideaal vir ’n Sondagmiddag-uitstappie. Die naam beteken “broederliefde” en dié sentiment word uitgebeeld in die 1993-rolprent Philadelphia wat in sy Pennsylvaniese naamgenoot afspeel.
Blyplekke in Philadelphia
Porterville
Porterville skuil aan die voet van die Olifantsrivierberge en is die rustigheid self. Proteas en koring is volop in dié geweste en jy kry sommer al die winkels en restaurante in die hoofstraat. Op eie bodem is dié dutjiesdorp enig in sy soort, maar in die VSA het hy naamgenote in Kalifornië, Texas, Utah, Kansas en Mississippi.
Blyplekke in Porterville
Robertson
Robertson staan bekend as die wyn- en roosvallei en lê pens en pootjies op die gewilde R62-wynroete. Dié wyn-mekka het ’n naamgenoot in Australië se Nieu-Suid-Wallis. “Robbo” soos dit onder die plaaslike inwoners bekendstaan, is ’n hoë reënvalgebied met vrugbare grond waarin aartappels gekweek word. Dié landboudorp het ook as stel vir die 1995-rolprent Babe gedien.
Blyplekke in Robertson
B&B | Gastehuis | Hotel | Selfsorg
Sedgefield
Sedgefield is ’n droombestemming met ’n sprokiesagtige strandmeer op die Tuinroete tussen George en Knysna. Sy oorspronklike naam was Ruigtevlei en dis later herdoop na die Suid-Afrikaanse politikus, wyle Henry Barrington, se geboorteplek ─ Sedgefield in die graafskap, Durham
Blyplekke in Sedgefield
Stanford
Die verlede leef behaaglik voort in dié Overbergse rivierdorpie met sy Eduardiaanse en Kaap-Victoriaanse huise wat uit die 1800’s dateer. Stanford het verskeie Britse naamgenote in Bedfordshire, Essex, Kent, Norfolk, Northamptonshire, Nottinghamshire, Oxfordshire en Worcestershire, asook in die Amerikaanse state Kalifornië, Idaho, Indiana, Illinois, Kentucky, Montana en New York.
Blyplekke in Stanford
B&B | Gastehuis | Hotel | Selfsorg
Wellington
Dié sluimerende dorpie skuil aan die voet van Groenberg in die Kaapse wynlande en is alombekend vir wyn, tafeldruiwe, sagtevrugte en brandewyn. Wellington is vernoem ter ere aan Arthur Wellesley, die eerste hertog van Wellington wat Napoleon by die Slag van Waterloo oorwin het. Sy Suidelike Halfrond-naamgenoot is Nieu-Seeland se hoofstad wat óók na die hertog van Wellington vernoem is.
Blyplekke in Wellington
B&B | Gastehuis | Hotel | Selfsorg
Worcester
Dié Breederiviervallei-dorp is die grootste in die Wes-Kaapse binneland en ’n ware bergparadys! Daar is minstens sewe bergpasse wat na Worcester lei en die dorp word omring deur die Stettyns-, Slanghoek-, Klein-Drakenstein-, Elandskloof- en Limiet-bergreekse, asook die Du Toitskloofberge. Sy Engelse naamgenoot is ’n stad in Worcestershire waar tradisionele worcestersous vandaan kom.
Blyplekke in Worcester
Daar is boonop ’n spul Kaapse voorstede met oorsese naamgenote, soos Boston, Scarborough, Plumstead en Clifton ─ die Wes-Kaap lê voorwaar die hele wêreld vol! Loer gerus na die Noord-Kaap, Mpumalanga, Limpopo en Vrystaat se naamgenote en laat weet ons as jou tuisdorp óók ’n internasionale eweknie het.
Hooffoto: Koringlande in die Swartland (Bigstock)
