Ná ’n lang winter kan ’n mens mos nie wág om weer jou sonhoed uit die kas te haal en kaalvoet op die strand te gaan stap nie. Dis beslis hoe ons die somer gaan vier! Bespreek een van dié mooi strandhuise vir jou en jou gesin voor dit opgeraap is, sodat julle ook die son, see en vreugde van die somer kan geniet.
On the Dunes in Noordhoek – Wes-Kaap
Plek vir: 8 gaste
Bonus: Rolstoelvriendelik
Dié strandhuis is spesiaal vir verskeie redes: Dis rolstoelvriendelik, dis op die strandfront in Noordhoek én dis aan die voet van Chapmanspiek wat dit ’n huis met ’n besonderse ligging maak. Die hoofslaapkamer spog met ’n privaat balkon en verder is daar ’n mooi dek met ’n swembad vir daardie warm somersdae.
Kliek hiér vir die tariewe.
Dazzling View — Wes-Kaap
Plek vir: 10 gaste
Bonus: ’n Onverbeterlike uitsig
Dazzling View bied verblyf in Knysna Heights met ononderbroke uitsigte oor die strandmeer. Die huis is perfek vir ’n groep familie en vriende wat mal is oor die see, oorgenoeg spasie nodig het en wat heel naweek ’n vuurtjie wil laat brand terwyl daar in die swembad baljaar word. Daar is selfs twee platskerm-TV’s en ’n klankstelsel.
Kliek hiér vir die tariewe.
The Beach House — KwaZulu-Natal
Plek vir: 8 volwassenes en 4 kinders
Bonus: Troeteldiere is welkom
The Beach House skuil aan die Suidkus van KwaZulu-Natal, bied maklike toegang tot die strand en het ’n mooi uitsig oor die see. Dié huis is netjies, groot genoeg vir die hele gesin en het ’n lieflike swembad, asook ’n braai- en tuinarea waar julle kan kuier, in die son baai en natuurlik heel naweek lank kan braai.
Kliek hiér vir die tariewe.
4 Zwaan — Oos-Kaap
Plek vir: 8 gaste
Bonus: Eksklusiewe strandfronteenheid
As julle mal is oor ’n see-uitsig móét julle by 4 Zwaan in Jeffreysbaai aanklop. Hierdie besonderse huis is lekker groot en het plek vir agt gaste in vier slaapkamers. Die kombuis is goed toegerus en het selfs ’n skottelgoedwasser vir ekstra gerief! Ons is veral mal oor die ingeboude braai en kaggel.
Kliek hiér vir die tariewe.
Gypsea Daze — KwaZulu-Natal
Plek vir: 8 gaste
Bonus: Eksklusiewe strandfronteenheid
Gypsea Daze is ’n moderne selfsorghuis in Pennington en het die mooiste uitsig oor die see en riviermond. Pennington se tweede strand is twee minute se ry ver en daar is ’n getypoel by die hoofstrand waar kinders heerlik kan baljaar — niemand sal hier verveeld wees nie. Kom ontspan op die dek, lê langs die swembad en gooi ’n paar tjoppies oor die kole.
Kliek hiér vir die tariewe.
Beach Villa — Wes-Kaap
Plek vir: 6 gaste
Bonus: Die villa het ’n privaat jetty.
Kom skop julle skoene hier by Beach Villa uit, want hiér kan julle ordentlik rus. Dié moderne huis is reg op Theseneiland se strand en spog met ’n kombuis wat goed toegerus is, vuurmaakplek en ’n lieflike dek met sonstoele, braaigeriewe en trappe wat direk na die strand lei.
Kliek hiér vir die tariewe.
The Water House — Wes-Kaap
Plek vir: 10 gaste
Bonus: Baie privaat
The Water House, ses kilometer buite Hermanus, is perfek vir gesinne met ’n liefde vir watersport aangesien dit lekker naby die water is. Dié huis is ook ideaal vir diegene wat ’n privaat vakansie verkies, want dit is op ’n landgoed waar daar net sewe eenhede is. Die stoep het ’n pizza-oond, braaigeriewe en direkte toegang tot die swembad en strandmeer.
Kliek hiér vir die tariewe.
Sandpiper — Oos-Kaap
Plek vir: 10 gaste
Bonus: Direkte toegang tot die strand.
Hier in die gewilde Kaap St. Francis-oord lê Sandpiper vir julle en wag om herinneringe te kom maak. Daar is vyf slaapkamers met en suite-badkamers — oorgenoeg plek vir die hele gesin. Kom span langs die swembad uit, braai ’n worsie vir middagete en loop af strand toe wanneer die son sak, want julle verdien om af te skakel!
Kliek hiér vir die tariewe.
The Sugar Shack — KwaZulu-Natal
Plek vir: 6 gaste
Bonus: ’n Swembad met ’n uitsig oor die promenade.
Vir ’n beter uitsig kan ’n mens nie vra nie! Dié eenheid skuil in Ballito en het geriewe soos ’n instapkas, ’n ekstra lang koninggrootte-bed in een van die kamers en hangmatte om julle wegbreek so effe luukser as gewoonlik te maak! By die vuurput kan julle braai terwyl julle na die see se gedruis luister.
Kliek hiér vir die tariewe.
Kanon Private Nature Reserve — Wes-Kaap
Plek vir: 6 gaste
Bonus: Hier kan julle wildkyk.
Kanon Private Nature Reserve is sowat tien kilometer vanaf Vleesbaai en het ’n hele paar eenhede om van te kies. Ons is mal oor elkeen van dié eenhede wat ideaal is vir gesinne en elk houtskool- of gasbraaigeriewe, ’n TV en gratis WiFi het.
Kliek hiér vir die tariewe.
Waarvoor wag jy? Maak seker jy en nou gesin het solank ’n huisie by die see vir wanneer die son weer skyn en ons heerlik op die strand kan uitspan!
Hooffoto: The Sugar Shack, LekkeSlaap
